ദർവേഷിന്റെ പുസ്തകം

നല്ലത് എന്നത് പൂർണ്ണമായും ഞങ്ങളിൽ മാത്രമുള്ള ഒന്നാണ് എന്ന് തോന്നിത്തുടങ്ങുന്ന ആ നിമിഷം മുതൽ അവർ പരാജയപ്പെട്ടു തുടങ്ങും.

വിശ്വമ്പരൻ! അദ്ദേഹത്തെ അറിയില്ലേ?! പ്ലാവകം തറവാടിന് സ്വന്തമായി ഒരു പ്രതിഷ്ഠയുണ്ടായിരുന്നു. തറവാടിനു പിന്നിൽ, അവിടുത്തെ പൂജാരിയായിരുന്നു ഈ വിശ്വമ്പരൻ. കടം കയറി മുടിഞ്ഞപ്പോൾ പ്ലാവകത്തുകാർ ഉള്ളതൊക്കെ വിറ്റുപെറുക്കി അവിടെ നിന്നു പോയി. അമ്മയും അച്ഛനും മാത്രം പോകാൻ കൂട്ടാക്കിയില്ല. ശിഷ്ടകാലം അവശേഷിച്ച സ്വത്തായ നീലിപയ്യിന്റെയും മകൻ മണിക്കുട്ടന്റെയും ഓർമ്മകൾ മണക്കുന്ന തൊഴുത്തിലായിരുന്നു അവർ കഴിഞ്ഞത്. അവരുടെയും കാലശേഷം, തൊഴുത്തും പ്രതിഷ്ഠയും ചുറ്റുമുള്ള കുറച്ച് സ്ഥലവും അവിടെയുള്ള വിശ്വാസികൾക്ക് വിട്ടുകൊടുത്തു. കൂടെ ആരോരും ഇല്ലാത്ത വിശ്വമ്പരനെയും. അവിടം ഭാവിയിൽ മനോഹരമായ, ദേവീസാന്നിദ്ധ്യമുള്ള ഒരു കാവായി വളർന്നു. കാവിന്റെ ഉള്ളിൽ അമ്മ നട്ടുനനച്ച പൂന്തോട്ടത്തിൽ വസന്തം എന്നും സമൃദ്ധമായിരുന്നു. പൂവിനായി ഒരു തമിഴത്തിക്കുട്ടി "തേൻമൊഴി" എന്നും വന്നുപോയിരുന്നു. വർഷങ്ങൾക്കപ്പുറം, വിശ്വമ്പരനെയും തേൻമൊഴിയെയും അവിഹിതസാഹചര്യത്തിൽ നാട്ടുകാർ പിടികൂടുകയും, പൂജാരിയെ പിഴപ്പിച്ചതിന് തേൻമൊഴിയെയും, കാവിനെ കളങ്കപ്പെടുത്തിയതിന് വിശ്വമ്പരനെയും, നാട്ടുകാർ ദേവിക്ക് ബലിയാക്കി. കോപം കൊണ്ട ദേവി അവിടം വിട്ടുപോയി. പ്ര...

തീരാത്ത രാഗങ്ങൾ, നീ എന്ന പുഴയിലെ ഒഴുകുന്ന ഗീതങ്ങൾ, നീ പുഴയായതു മുതൽ ഞാൻ മത്സ്യങ്ങളെ കൊന്നുതുടങ്ങി. ഞാൻ അല്ലാതെ മറ്റൊന്നും നിന്നിലുള്ളത് എനിക്ക് സഹിക്കാൻ കഴിയുമായിരുന്നില്ല.

പകർച്ചവ്യാധി ഭയന്ന് ആ മരുഭൂമിയുടെ ഇരുവശങ്ങളിൽ നിന്ന് രണ്ടുപേർ അതിലേക്കോടിക്കയറി. ഒന്ന് അന്നത്തെ വൃദ്ധനും മറ്റൊന്ന് ഇന്നത്തെ പുത്രനും, തെളിവില്ലാത്ത ധാരാളം കാൽപ്പാടുകൾക്ക് ശേഷം, അവർ കണ്ടുമുട്ടി. ഉടൻ തന്നെ ആ വൃദ്ധൻ ഇന്നിനു കാരണമായി ഒരു കാവ്യം പറഞ്ഞു. പുത്രന്റെ മറുപടി ഇങ്ങനെയായിരുന്നു: '' കവിതയൊക്കെ പഴയ അന്ധവിശ്വാസങ്ങളല്ലേ..." വൃദ്ധൻ സുരക്ഷക്കായി കൈയ്യിൽകരുതിയ കത്തിയെടുത്ത് പുത്രനെ കൊന്നുകളഞ്ഞു. അവന്റെ ചോരയിൽ മരുഭൂമിയിലെ മണ്ണ് ചുവന്നു. ഭൂമിക്കിടയിലെ കുഴികളിൽ ഒതുങ്ങിനിന്ന കടൽ കയറിവന്നു മണ്ണിലെ ചോരയും, വിണ്ണിലെ അണുക്കളും കഴുകി മടങ്ങിപ്പോയി.

ഞാൻ മരിക്കും മുൻപ് നീ മരിക്കണം, ഇല്ല എങ്കിൽ നിന്റെ മരണവാർത്ത കേൾക്കുന്നതുവരെയെ എനിക്കു ജീവിക്കാൻ കഴിയൂ" മരണം കൊണ്ടു മാത്രമേ എനിക്കു നിന്നോടുള്ള സ്നേഹം അവതരിപ്പിക്കാനും കഴിയൂ. "മരണം അത് ദൈവത്തിന്റെ തെളിവാണ് സ്നേഹം പോലെ.